Embaixadora TL ba CPLP hasoru Primeiru-Ministru hodi rona instrusaun servisu
DILI, 19 Marsu 2026 (TATOLI)—Embaixadora Timor-Leste ba Komunidade Ko’alia Lian Portugés (CPLP, sigla portugés), Natália Guterres Viegas Carrascalão, hasoru malu ho Primeiru-Ministru, Kayrala Xanana Gusmão, hodi rona instrusaun servisu nu’udar orgaun diplomata iha CPLP.
Embaixadora Timor-Leste ba CPLP, Natália Guterres Viegas Carrascalão, hateten bainhira nia simu kna’ar hanesan Embaixadora Timor-Leste ba CPLP nian, entaun nia tenke mai hasoru malu ho Primeiru-Ministru nia orientasaun saida mak nia tenke halo liuliu aproximasaun kontestu situasaun atuál, aproximasaun kooperasaun servisu no vizita ofisiál ba nasaun membru CPLP ne’ebé sei koopera apoiu malu iha área oioin hanesan edukasaun, kultura, agrikultura, tasi, saúde no seluk tan
” Primeiru-Ministru fó hela instrusaun no nia tenke halo hanesan relatóriu informasaun hodi halo segimentu ba ninia kna’ar hanesan Embaixadora CPLP iha Timor-Leste,” Embaixadora ne’e informa ba jornalista sira iha Palásiu Governu, ohin.
Orgaun diplomata ne’e dehan instrusaun ne’e mak hanesan orgaun diplomata ida sei implementa no buka kooperasaun bilaterál entre nasaun membru CPLP, apoiu ba malu iha área ne’ebé nesesáriu presiza, liuliu impaktu funu iha médiu oriente ba nasaun membru sira hotu tanba nia Embaixadora multilaterál entaun nia tenke iha kontaktu ho nasaun membru CPLP hotu.
“Kooperasaun sira-ne’ebé lori investimentu mai iha Timor ne’e parte bilaterál, maibé karik iha oportunidade ha’u sei ko’alia kona-ba kondisaun Timor nian liuliu setór turizmu,” nia hateten.
Tanba ne’e, nia hateten, kona-ba reuniaun sektoriál membru nasaun CPLP nian ida ka rua bele akontese (realiza) iha Timor kona-ba agrikultura, turizmu, saúde, edukasaun, kultura. Maibé reuniaun sira-ne’e sei akontese iha kualker membru CPLP, la’ós ita de’it.
Jornalista : Alexandra da Costa
Editór : Cancio Ximenes
