Governu minimiza presu mina atu labele fó impaktu ba ekonomia nasionál
DILI, 25 Marsu 2026 (TATOLI)—Governu liuhusi Ministru Petróleu no Rekursu Minerál, Francisco da Costa Monteiro, kontinua minimiza presu mina ba retalitas sira atu labele fó impaktu ba ekonomia nasionál iha Timor-Leste.
“Ohin, ami mai halo aprezentasaun ida medida temporáriu atu solusiona kona-ba kestaun seguransa enérjia iha ita-nia nasaun no tau atensaun ba situasaun sira-ne’ebé inserteza iha mundiál, nomós haree kona-ba medida intervensaun nesesáriu ne’ebé mak Governu presiza halo ba presu mina nian kuandu presu ne’e sa’e makaas futuru,” Ministru Petróleu no Rekursu Minerál, Francisco da Costa, informa ba jornalista sira iha Palásiu Governu, ohin.
Nune’e saida mak Governu presiza halo para minimiza impaktu boot ba Timor-Leste nia ekonómia nasionál, ida-ne’e mak ohin sira aprezenta iha Konselku Ministru aprova ona no hein promulgasaun husi Prezidénsia Repúblika.
Tanba objetivu prinsipál atu hamenus impaktu instabilidade internasionál atuál iha setór enerjétiku, garante estabilidade folin kombustivel iha territóriu nasionál no garante kontinuidade ba nia abastesimentu.
Desizaun koletiva iha Konsellu Ministru ba medida prinsipál sira-neʼebé aprova ona, destaka estabelesimentu limite másimu ba folin kombustivel nian, ne’ebé Estadu fó subsídiu neʼebé finansia husi Orsamentu Jerál Estadu. Nune’e, presu labele liu $1,50 kada litru ba gazolina, $1,65 kada litru ba gazóleu, $2,50 kada litru ba avtur no $4,20 kada kilograma ba gás (LPG).
Define ona mós mekanizmu ba koordenasaun entre entidade públika no operadór sira setór ne’e nian atu garante abastesimentu no mós medida esepsionál sira ba kontrolu merkadu nian, fiskalizasaun reforsada no aplikasaun sansaun sira iha kazu infrasaun, inklui kombate dezviu ilegál (uzu ilegál) husi kombustivel subsidiadu sira.
Ho desizaun ida-ne’e, Governu hanoin atu proteje kbiit sosa família sira-nian, hamenus impaktu aumentu folin ne’ebé karik akontese iha ekonomia no mós garante funsionamentu regulár husi atividade ekonómika, iha tempu hanesan hodi asegura disponibilidade hosi kombustivel durante períodu instabilidade internasionál.
Jornalista : Alexandra da Costa
Editór : Cancio Ximenes
