Governu anula konkursu públiku admisaun ba ajente PNTL 2025-sei loke fali kokursu iha 2026
DILI, 25 Marsu 2026 (TATOLI)—Governu liuhusi desizaun koletiva iha Konsellu Ministru anula konkursu públiku admisaun iha kursu formasaun ajente Polísia Nasionál Timor-Leste (PNTL) 2025 no mandatu ba abertura konkursu iha tinan 2026.
Hafoin Governu halo analiza aprezentasaun husi Ministru Interiór, Francisco da Costa Guterres, kona-ba konkluzaun relatóriu finál husi Komisaun Monitorizasaun no Fiskalizasaun Konkursu Públiku Admisaun ba Kursu Formasaun Ajentes PNTL nian ne’ebé kria tuir Rezolusaun Governu nú. 10/2026, 11 Fevereiru, ne’ebé identifika evidensias sufisiente lubun ida hodi hatudu ezisténsia irregularidade materiál ne’ebé grave iha prosedimentu konkursu nian ida-ne’e.
Nune’e haree ba irregularidade ne’ebé identifika ne’e, Konsellu Ministrus aprova projetu Rezolusaun Governu ne’ebé determina anulasaun parsiál ba konkursu públiku admisaun iha kursu formasaun ajentes Polísia Nasionál Timor-Leste 2025 no mandatu ba abertura konkursu iha tinan 2026.
Tamba ne’e tuir Ministru Interior, Francisco da Costa Guterres, hateten ohin iha reuniaun Konsellu Ministrus ohin ko’alia mós kona ba rekrutamentu kadetes no Konsellu ministru simu relatóriu husi Komisaun Monitorizasaun no Fiskalizasaun, ba prosesu konkursu públiku admisaun ajente PNTL 2025.
Komisaun ida ne’e kompostu husi entidades oioin hanesan Parlamentu Nasionál, Prezidénsia Repúblika, Provedór Direitu Umanu no Justisa (FDCH), jurista husi Funsaun Públiku, veteranu balun no jurista estranjeiru husi Portugál, Austrália, entaun sira haree dokumentu hotu-hotu, no sira rekomenda ba Governu presiza duni halo anulasaun ba rezultadu ida-ne’e, tanba sira hetan deskrepansia barak iha prosesu ida-ne’e.
“Ho ida-ne’e Governu aprova no konkorda atu halo anulasaun, maibé sira mós rekomenda katak iha faze ida mak loos, faze dokumentál katak dokumentu sira-ne’e mak loos. Ida-ne’e sei haree hotu tanba ne’e sira dehan katak anula resultadu ida ne’e, maibé bainhira prosesu teste tuir mak falla no problema. Entaun, sira rekomenda atu reteste fila-fali ba de’it kandidatu ne’ebé liu tiha ona prova dokumentu ne’ebé hamutuk rihun 12-resin,” Ministru ne’e hateten ba jornalista sira iha Palásiu Governu, ohin.
Nune’e governante ne’e dehan desizaun husi Konsellu Ministru aprova no konkorda katak kandidatu sira-ne’ebé liu tiha ona faze dokumentu sira-ne’e mak sei tuir fali teste.
Nia hatutan prosesu teste ne’e ohin konsellu ministru propoin iha faze tolu mak hanesan iha faze dahuluk mak prova kulturál, katak teste eskrita, laiha tan saúde iliminatóriu, no teste piskolijika ne’e mós iliminatóriu no ikus liu teste saúde, no ida-ne’e mak determina kandidatu selesionadu na’in-400.
Nia afirma tanba ne’e ohin Konsellu Ministru husu mós Ministériu Interiór tenke hari’i fali juri foun ida, ne’ebé sei kompostu husi PNTL, GNR Portugál, ASP Austrália no mós Funsaun Públika, liuliu ba iha teste eskrita, ne’ebé sei halo ho sistema eletróniku, aleinde ne’e mós tenke hari’i komisaun supervizaun no komisaun monitorizasaun supervizaun Fiskalizasaun atu akompaña prosesu ne’e to’o hotu.
“Konsellu Ministru ohin fó kompeténsia mia ha’u atu haree relatóriu ne’e karik iha irregularidade, komisaun tenke loke prosesu investigasaun kle’an ba asuntu ida-ne’e. Karik involve krime ruma ita sei rekomenda halo investigasaun kriminál tenke mosu,” nia hateten.
Enkuantu rezolusaun Governu ne’e determina repetisaun prova selesaun (kulturál, psikolójika no saúde) ba kandidatu hotu-hotu ne’ebé admitidu iha faze inisiál (prova dokumentál) konkursu nian.
Aleinde ne’e, Ministru Interiór hetan instrusaun atu nomeia juri foun ida, ho kompozisaun reforsada ida-neʼebé inklui entidade nasionál no internasionál sira ho kompeténsia rekoñesida, no atu kria Komisaun Supervizaun no Fiskalizasaun independente ida, ho partisipasaun parseiru internasionál sira, ho objetivu atu garante transparénsia, legalidade no imparsialidade hosi faze hotu-hotu prosesu nian.
Rezolusaun Governu ne’e hato’o mós rekoñesimentu ba dedikasaun no serbisu ne’ebé Komisaun Monitorizasaun no Fiskalizasaun hala’o, hodi destaka ninia kontribuisaun ba salvaguarda kredibilidade instituisaun públika no direitu sidadaun sira-nian.
Jornalist : Alexandra da Costa
Editór : Cancio Ximenes
