PM Xanana fó orientasaun ba Embaixadora TL ba ASEAN molok hala’o misaun
DILI, 31 Marsu 2026 (TATOLI)—Emabaixadora Timor-Leste ba ASEAN, Elisa da Silva, hala’o enkontru ho Primeiru-Ministru, Kay Rala Xanana Gusmão, hodi rona orientasaun servisu molok hala’o nia misaun iha Indonézia.
Notísia Relevante: Ramos-Horta fó pose ba Embaixadóra Reprezentante Permanente TL ba ASEAN Elisa Maria
Embaixadora Timor-Leste ba ASEAN, Elisa da Silva, hateten ohin nia mai hasoru Primeiru-Ministru atu hato’o agradesimentu ba konfiansa ne’ebé fó ba nia hodi sai Embaixadora Timor-Leste ba ASEAN, ne’ebé destaka iha Jakarta-Indonézia.
“Ha’u mai hasoru Primeiru-Ministru atu simu orientasaunn servisu ba ha’u-nia mandatu, saida mak ha’u tenke halo liga ho sistuasaun agora daudaun ne’ebé akontese iha mundu,” Embaixadora ne’e informa ba jornalista sira iha Palásiu Governu, ohin.
Nia sei halo observasaun no monitorizasaun kona-ba situasaun hodi informa ba kapitál atu responde ba situasaun ne’e rasik, tanba akontesimentu iha médiu oriente afeta tebes ba nasaun hotu-hotu inklui Timor-Leste.
“Tamba ne’e mak Xefe Governu orienta ha’u atu haree kona-ba asuntu ne’e inklui mós kontinua haree Timor-Leste nia partisipasaun ba enkontru ASEAN sira hotu, tanba ita sai ona membru plenu entaun ita tenke partisipa másimu ba interese nasionál no kontribui mós ba ajenda ASEAN nian,” nia dehan.
Entretantu, razaun ida-ne’e atu Timor-Leste la’ós sai de’it membru maibé kontribui ho ativamente liuliu TL nia preparasaun asume prezidénsia ASEAN iha tinan 2029.
Jornalista : Alexandra da Costa
Editór : Cancio Ximenes
