Governu aprova modelu organizasaun foun ba servisu-kargu diresaun no xefia RAEOA
DILI, 01 Abríl 2026 (TATOLI)—Konsellu Ministrus, kuarta ne’e, aprova projetu rezolusaun Governu neʼebé aprezenta husi Ministru Administrasaun Estatál, Tomás do Rosário Cabral, hodi define modelu organizasaun foun ba servisu no kargu diresaun no xefia iha Rejiaun Administrativa Espesiál Oekusi Ambenu (RAEOA).
Rezolusaun Governu ida-ne’e ho objetivu atu asegura implementasaun modelu organizasaun foun ba servisu Rejiaun Administrativa Espesiál Oekusi Ambenu, tuir reforma estruturál ne’ebé introdús husi Dekretu-Lei n. 1/2026, 02 Fevereiru, aliña ho ida-neʼebé adota ona ba administrasaun territoriál nasionál tomak.
Nune’e, Ministru Administrasaun Estatál iha responsabilidade atu elabora no hato’o ba Konsellu Ministru proposta fundamentada ida ho kuadru foun ba dirijente no xefe servisu rejionál sira, akompaña ho ninia organograma no mós definisaun ba perfíl kompeténsia sira-ne’ebé presiza ba kargu ida-idak, iha koordenasaun ho Ministériu Finansa no Komisaun Funsaun Públika.
Aleinde rezolusaun ne’e estabelese mós abertura ba prosesu provimentu (prienximentu) kargu diresaun no xefia hafoin aprovasaun ba proposta, nune’e mós mantein titulár atuál sira iha sira-nia funsaun to’o prosesu provimentu (prienximentu) ne’e nian remata. Aprovasaun ba proposta ne’e tenke halo iha loron 40 nia laran.
Desizaun ida-ne’e ho objetivu atu garante tranzisaun ida-neʼebé organizadu lahó interrupsaun iha funsionamentu servisu Rejiaun nian, no reforsa kapasidade administrativa, klareza iha estrutura organizasaun no prestasaun servisu públiku ba komunidade lokál sira.
Jornalista : Alexandra da Costa
Editór : Cancio Ximenes
