Lian-na’in Oekusi oferese lilin, kabas no mina nuu husu matak-malirin ba ‘Senhor Morto’
OEKUSI, 01 Abríl 2026 (TATOLI) – Lia-na’in sira husi suku 20 iha Rejiaun Administrativa Espesiál Oekusi Ambeno (RAEOA), kuarta-feira lorokraik ne’e, oferese lilin naturál 350 ho kabas inklui bua-malus no mina nuu, nu’udar oferta anuál ba Senhor Morto iha igreja tuan Oekusi atu husu matak malirin iha semana santa paskua ne’e.
Molok entrega, liurai Dacosta, António Hermenegildo da Costa, akompaña husi aman Bobo Ban-Afi, oferese mós ba parókia lima iha sub-rejiaun haat, Pante Makasar, Oésilo, Pássabe no Nítibe estasaun sira, kapela Santo antónio, Santo Liliqui Citrana no seluk tan.
Reprezentante lia-na’in suku 20, Cipriano da Cunha, informa, objetivu husi asaun ne’e, nu’udar oferta anuál, hanesan lisan ida, dezde avo sira husi jerasaun ba jerasaun atu husu matak-malirin ba Senhor Morto.
“Lisan ida-ne’e, dezde tempu avo sira, katak tinan-tinan oferese lilin, kabas, bua-malus no mina nú ba Senhor Morto, buat hirak-ne’e natureza ninian, ne’e signifika suku 20 iha Oekusi, sira-nia kosar-been, sira-nia kolen durante tinan ida, mak ohin lorokraik kmanek ne’e hanesan semana santa, lori sira-nia rikusoin, la’ós osan-mean ka osan-mutin,” nia hateten iha igreja Tuan, lorokraik ne’e.
Nia esplika, jestu ida-ne’e, hanesan agradesimentu tinan ida-nian, nune’e bele hetan grasa Maromak nian, hodi hetan matak no malirin.
“Ne’e katak, natureza lilin nian, mai husi bani, bani ne’e ba hola ai-funan, ai-funan morin nian, ida-ne’e mak ami-nia ofertóriu,” nia afirma.
Iha biban ne’e, Padre Florindo de Jesus, nu’udar administradór parókia Oekusi, agradese ba lia-na’in suku 20, no konsidera asaun ne’e nu’udar sinál domin ba Maromak atu hetan matak-malirin.
“Bemvindo, ohin inan-aman sira mai hasa’e buat karan, mai husi ita-boot sira-nia kolén no sakrifísiu kosar-been buat ne’ebé iha, mai hasa’e sakrifísiu ba Maromak, hein katak ho buat sira-ne’ebé ohin hasa’e ba Senhor Morto, buat hirak-ne’e hotu, prepara ita-nia aan atu selebra festa paskua ho hodi hahí Nai Jesus Kristu, nia terus to’o mate no moris hiás,” nia hateten.
Notísia relevante:PR Horta ho emosaun asiste serimónia selebrasaun Senhor de Morto iha Oé-Cusse
Tuir ajenda, misa Senhor Morto sei hala’o iha loron sexta-feira santa lorokraik hodi sunu lilin no hala’o mós prosesaun kuaze oras ida hodi haleu igreja tuan ne’ebé lokaliza iha Santa-Roza suku Costa sub-rejiaun Pante Makasar.
Jornalista: Abílio Elo Nini
Editór: Rafael Ximenes de A. Belo
