Fundu Konsesaun Eskolár rihun $227-resin iha RAEOA alokadu ba eskola 103
OEKUSI, 01 Abríl 2026 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA), kuarta ne’e, distribui ona fundu konseisaun eskolár hamutuk rihun $227,975.00 ba eskola 103 ho durasaun fulan lima.
Notísia relevante:Edukasaun Oekusi sei halo auditória ba ezekusaun fundu konsesaun eskolár
Diretór Diresaun Rejionál Edukasaun no Solidariedade Sosiál, Vincêncio Cono, relata katak, eskola 103 ne’e, komposta husi Ensinu Pré-Eskolár (EPE) 16 hetan fundu rihun $7,750.00, Ensinu Báziku Sentrál (EBC) inklui nia filiál sira hamutuk 80 hetan fundu $178,460.00.
Nune’e mós ba Ensinu Sekundáriu Jeral (ESG) haat hetan fundu rihun $29,665.00, no Ensinu Tékniku Vokasionál (ETV) hamutuk tolu (3) hetan fundu rihun $12,100.00.
“Fundu ne’e alokadu ba fulan lima faze dahuluk kobre eskola públika no privada. Eskola privada sira kada alunu hetan dollar $1 tanba sira iha propina no eskola públika kada alunu hetan dollar $2,” nia hateten iha salaun edukasaun Oekusi, ohin.
Notísia relevante:Edukasaun RAEOA konsege utiliza fundu konsesaun eskolár hodi hadi’a eskola sira
Dirijente Oekusi ne’e, konfirma, objetivu husi fundu Konsesaun Eskolár ne’e, dahuluk atu aselera no promove enkontru hodi garantia transparánsia ba eskola sira, liliu dirijente sira atu serbisu hamutuk ho filial sira.
Objetivu daruak, atu apoia materia didátika iha eskola, tanba ezame sei presiza surat-tahan, tinta, produsaun lista prezensa, produsaun formatu aváliasaun ba estudante idak-idak.
Objetivu datoluk, ho fundu ne’e bele hadi’a reparasaun eskola, hanesan odamatan, bidru janela, pinta eskola. Objetivu dahaat, apoia profesór sira realiza atividade extrakurikulár hanesan desportiva eskolár.
Objetivu Dalima, atu apoia andamentu enkontru profesór nian kada períodu hodi promove transparánsia no sentimentu pertensia ba profisaun nu’udar manorin na’in.
“Husi fundu Konsesaun Eskolár ne’e aloka ba estudante sira iha eskola 103 ne’e hamutuk 41.765,” nia afirma.
Notísia relevante:Merenda Eskolár iha RAEOA sei gasta rihun $500-resin ba loron efetivu 64
Diretór Eskola Tékniku Vokasionál Palaban, José António Oqui, promete ho fundu ne’e, sei utiliza ba nesesidade eskola, liliu materia didátika no adminitrasaun eskola nian.
“Ami hetan ba alunu 1005 ho montante rihun $11,140.00, ami sei utíliza ba nesesidade eskola nian liliu materia didátika, tantu estuante no profesór sira-nian, no eskritóriu eskola ba suntu administrasaun nian ba prosesu ensinu aprendizajén,” nia hateten.
Entretantu, fundu Konsisaun Eskolár rihun $227,975.00 ne’e, Autoridade RAEOA aloka husi Orsamentu Jerál Estadu (OJE) 2026 nian.
Jornalista: Abílio Elo Nini
Editór: Rafael Ximenes de A. Belo
