Sentidu husi Sesta-Feira Santa mak Jesus entrega-an salva umanidade husi sala
DILI, 03 Abríl 2026 (TATOLI)—Arsebispu Arkidioseze Metropolitana Dili, Dom Virgílio Cardeal do Carmo da Silva, SDB, Pároku Parókia Santo Antônio Motael, Padre Guilhermino da Silva, sesta ne’e, hamutuk ho sarani sira kontempla Via Sakra ne’e nu’udár tradisaun forte ida tuir estasaun sira-ne’ebé reprezenta sofrimentu Jesus Kristu Nian, Reza hamutuk iha kada estasaun.
Sentidu husi Sesta-Feira Santa mak Jesus Kristu entrega-an hodi salva umanidade husi pekadu. Jesus mate iha Krús hatudu domin boot no sakrifísiu kle’an ba umanidade.
Loron ida-ne’e fó oportunidade ba ema atu hanoin sala sira hotu no buka dalan atu hakribit salan sira liuhosi “Peniténsia no Arrependimentu”.
Igreja la halo misa hanesan loron sira seluk, tanba ohin ne’e hanesan loron ba halo de’it orasaun, meditasaun no fó respeitu boot bá sofrimentu liuhusi “Silénsiu no Laran-metin”.
Maske triste tanba mate, maibé Sesta-Feira Santa prepara umanidade ba ksolok boot-liu iha Domingu Páskua ka Domingu Resurreisaun nian.
Ohin mós Sesta-Feira Santa, ahi oan iha Tabernákulu tenke hamate tanba iha sentidu espirituál bo’ot-liu.
Ahi oan hamate tanba Jesus laiha Tabernákulu. Normalmente, ahi-oan lâmpada santu ne’ebé hatudu katak Jesus Kristu prezente iha Eukaristia iha Tabernákulu. Maibé iha loron ne’e, Eukaristia la hela iha Tabernákulu, tanba ne’e ahi oan mós hamate.
Ne’e hatudu Sinál tristeza no lutu hodi lembra Jesus Kristu Nia mate. Igreja hatudu lutu no silénsia, tanba ne’e lúz ka ahi oan mós seidauk bele halakan.
Igreja iha situasaun “Moris Laiha Naroman” Simboliza katak mundu iha eskuridaun temporária, tanba Jesus mate ona.
Iha tradisaun Katóliku, Sesta-Feira Santa nu’udár loron importante ida, tanba loron ida-ne’e nakonu ho triste maibé tristeza ida ne’ebé prepara umanidade ba ksolok bo’ot-liu iha Domingu Páskua ka Domingu Resurreisaun nian.
Loron tristeza tanba sarani sira hala’o prátika relijiozu ida-ne’ebé hatudu dalan sofrimentu Jesus Kristu Nian liuhusi lori Krús iha Dalan-Krús to’o mate iha Krús.
Sentidu boot liu mak ahi oan ne’ebé hamate hatudu auzénsia, prepara umanidade bá Naroman Foun iha Páskua ka Resurreisaun. Iha Domingu Páskua, naroman fila-fali simboliza Jesus Kristu moris hias ona.
TATOLI
