Kontentór okupa arredór EBC Mahata Oekusi, Difikulta prátika desportu eskolar
OEKUSI, 01 Abríl 2026 (TATOLI) – Koordenadora Eskola Bázika Sentrál (EBC, sigla portugés) 1,2,3 Mahata Hermina Caet preokupa tanba kontentór sira dezde 2015 sei kontinua okupa arredór eskola hodi difikulta estudante sira bainhira hala’o prátika eskola nian.
Nia informa, antes ne’e husi parte eskola hato’o ona karta ba iha Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Edukasaun atu muda kontentór sira, maibé to’o ohin loron seidauk muda, tanba ne’e, responsavel eskola ne’e, kontinua rekomenda atu konsidera.
“Ha’u hatama ona karta ba diresaun, kontentór sira-ne’e tenke muda sai, tanba estudante sira bainhira asesu ensinu aprendizajén liliu mak dixiplina desportu atu halo prátika, ami sempre buka fatin iha tasi-ninin, tanba aredores ne’e okupa hotu,” nia hateten iha Mahata, ohin.
Hatan ba Diretór ba preokupasaun ne’e, Diretór Diresaun Rejionál Edukasaun no Solidairedade Sosiál Oekusi, Vincêncio Cono, afirma, daudaun ne’e diresaun edukasaun koordena ona ho Diresaun Rejionál Infraestrutura RAEOA liuhusi ekipa IGEADI,I.P atu muda sai kontentór hirak-ne’e.
“Ami rekoñese preokupasaun ne’e kle’ur ona, ha’u mós koordena ona ho ekipamentu sira iha obra públika, husu ajuda atu hasai sasán sira, ne’ebé ita hein katak, tempu-badak bele muda sai, tanba kle’ur ona dezde 2015, buat sira-ne’e sei kontinua tau hela iha fatin ne’e,” nia promete.
Notísia relevante:Aniceto Berlelo: “Presiza hamoris desportu eskolár iha eskola”
Entretantu, kontentór ne’ebé okupa arredór eskola EBC Mahata hamutuk 10, ne’ebé dezde 2015 Autoridade anteriór mak utiliza tau ekipamentu ba atividade selebrasaun tinan-500 Lifau nian, no to’o oras ne’e seidauk muda sai hodi difikulta atividade sira iha estabelesimentu ensinu.
Enkuantu totál estudante iha EBC 1,2,3 Mahata hamutuk 591.
Jornalista: Abílio Elo Nini
Editór: Rafael Ximenes de A. Belo
