PDHJ seidauk anúnsia rezultadu averiguasaun prosesu fornesimentu karau iha Oekusi
OEKUSI, 04 Marsu 2026 (TATOLI) – Ekipa Provedória Diretu Umanu no Justisa (PDHJ) Delegasaun Territoriál Rejiaun Administrativa Espesiál Oekusi Ambeno (RAEOA), kuarta ne’e, halo ona averiguasaun no prosede investigasaun ba Diretór Diresaun Rejionál Agrikultura, José Oqui, kona-ba prosesu fornesimentu karau liuhusi programa inseminasaun artifisiál ba sub-rejiaun haat iha Oekusi.
Hafoin averiguasaun, Diretór PDHJ Oekusi, Bartolomeu Gonçalves, hato’o katak objetivu husi averiguasaun ne’e atu konfirma dirijente agrikultura Oekusi, bazea ba informasaun ne’ebeé espalla iha mídia sosiál tanba suspeita iha irregularidade ba prosesu fornesimentu karau liuhusi inseminasaun artifisiál.
“Ohin mai ho ekipa investigadór no fiskalizasaun, ho objetivu atu mai ko’alia ho Diretór Agrikultura kona-ba asuntu balun ne’ebé ami seidauk konklui, serteza buat balun ne’ebé la taka, tanba virál ona iha mídia sosiál kona-ba prosesu aprovizionamentu karau, atu fornese ba komunidade sira maibé ami seidauk hateten buat ba públiku, katak iha violasaun ka lae, ami mai só halo apuramentu, levantamentu dadus de’it,” Diretór PDHJ Oekusi ba jornalista sira iha edifísiu Agrikultura, ohin.
Notísia reelvante:Última hora: PDHJ hein hela Diretór José Oqui hodi averigua prosesu fornesimentu karau
Dirijente PDHJ ne’e, konfirma, bainhira rekolla ona dadus, ikusmai sei konklui relatóriu ida atu submete ba provedór nasionál, tanba provedór mak iha autoridade tomak atu bele públika, katak iha violasaun ruma ka la’e.
“Provizorimente ami mai vizita husu informasaun balun, tanba mídia sira públika iha mídia sosiál virál, entaun hanesan instituisaun Estadu ida, iha obrigasaun atu konfirma, seraké loos ka la’e, agora loos ou la’e, ne’e iha faze apuramentu, halo konsultasaun no konfirmasaun ho Diretór Agrikultura Rejionál Oekusi nian,” nia afirma.
Notísia relevante:Diretór Agrikultura RAEOA klarifika prosesu fornese karau inan ba programa inseminasaun artifisiál
Iha biban ne’e, Diretór Diresaun Rejionál Agrikultura Oekusi, José Oqui, konsidera vizita traballu ne’e importante tanba nu’udar servidór Estadu tenke koopera atu garante transparánsia ba públiku.
“Ohin ha’u esplika hotu kona-ba programa artifisiál inseminasaun, hahú husi sosa karau kompleta ho luhan, no kompañia hira mak kaer projetu ne’e, ha’u informa katak, ida sosa karau ne’e, kompañia rua mak ezekuta, no kompañia ida mak halo luhan ba karau sira,” nia hateten.
Autoridade Agrikultura ne’e esplika, iha ámbitu ne’e, nia esplika no klarifika ba ekipa PDHJ hahú prosesu inísiu to’o faze implementasaun.
“Ohin sira (PDHJ) mai husu kona-ba programa sosa karau prevee iha Planu Asaun Anuál ka la’e, ne’ebé hau hateten katak loos prevee iha planu duni, depois husu kona-ba prosesu ne’ebé mai husi departamentu pekuária enkamiña ba Prezidente Autoridade no prosesa iha diresaun planeiamentu no aprovizionamentu, ohin ha’u esplika hotu pergunta sira-ne’e. Ne’ebé, ohin ha’u fó ona lista kona-ba benefisiáriu sira, ha’u kopia entrega ona, hela de’it dokumentu PAA, ho tan karta akompañamentu prosesu ne’e ba iha Prezidente Autoridade,” nia hateten ba jornalista sira.
Nune’e mós parte PDHJ husu kona-ba lamentasaun públiku, ba karau sira-nia folin rihun $1 kada karau, maibé rejeita no esplika katak laloos, tanba karau ida nia folin ne’e $800, no mós dokumentu ne’ebé presiza fó ba ekipa kona-ba informasaun ne’ebé virál iha mídia sosiál ne’e.
“Ne’ebé, konstrusaun ba karau luhan sira iha sub-rejiaun Pássabe no Oésilo finaliza ona, enkuantu ba sub-rejiaun Nítibe ho Pante Makasar, sei konstrusaun hela tanba kompañia sei prosesa hela pagamentu.
Entretantu, verba programa inseminasaun artifisiál ne’e ba karau de’it Autoridade RAEOA prevee rihun $150,000,00 ba luhan hamutuk rihun $120,000,00 ne’ebé aloka husi Orsamentu Jerál Estadu (OJE) 2026 nian, ne’ebé ezekuta husi kompañia Oki Molo Unipesoál Lda no kompañia Rapha Batista Unipesoál Lda alvu ba sub-rejiaun Oésilo, Pássabe, Nítibe no Pante Makasar.
Jornalista: Abílio Elo Nini
Editór: Rafael Ximenes de A. Belo
