Traballadór timoroan Joel Assa mout iha tasi Coffs Harbour Austrália
DILI, 07 Abríl 2026 (TATOLI)-Traballadór timoroan, Joel Assa, mout iha tasi Coffs Harbour, NSW Austrália iha 05 Abríl, kuazé tuku 10h15, hafoin ba kail ikan ho nia kolega na’in-rua iha tuku 06 lorokraik.
Embaixadora Timor-Leste iha Austrália, Inês Almeid, simu ona informasaun kona-ba traballadór timoroan ne’ebé mout iha tasi Coffs Harbour, NSW.
Aleinde ne’e, tuir sasin-matan traballadór timoroan, Agusto Soares, hateten nia hela hamutuk ho Joel asa no bainhira sai husi servisu, vítima Joel Asa ho kolega ida seluk bolu malu ba kail ikan iha tasi.
“Sira na’in-rua ba tiha uluk hafoin ha’u tuir ba, ha’u haree tasi boot, ne’ebé ha’u ko’alia ba sira na’in-rua dehan tasi boot hanesan ne’e ha’u tauk no ha’u la brani ida. Nune’e, kolega na’in-rua ne’e mak kail, ha’u tuur dook hodi haree de’it,” sasin-matan ne’e tuir voice ne’ebé jornalista asesu iha iga grupu whatsapp.
Nia hatutan, maibé derepente de’it kala kolega ida kail kona ikan maibé dada la sai entaun sira na’in-rua (2) deside tesik ba sorin buka tuir kail nia talin, nia konsege dehan ba sira lalika ba maibé sira rua nafatin tuun ba tasi laran.
“Entaun lakle’ur laloran boot mai, ha’u hakilar dehan halai, maibé la halai, nune’e laloran boot ne’e mai baku nia, hakfodak, ami-rua kolega seluk hateke ba rai mamuk tiha ona. Maske, nia konsege hakilar maibé tasi ne’e kle’an, ami hamri’ik de’it iha fatuk leten. Entaun ha’u halai fila ba uma hodi kontaktu ba polísia hodi ba buka kedas kolega Joel nia paradeiru,” nia esplika.
Ho nune’e, daudaun ne’e, ekipa polísia Austrália kontinu buka tuir trabalkadór timoroan Joel Assa ne’ebé mout iha tasi ho elikoptéru no ró.
Agência Tatoli konfirma ona husi parte SEFOPE maibé seidauk iha resposta tanba sira sei hein informasaun detallu husi adidu traballadór iha Austrália
Entretantu, traballadór timoroan ne’e ho naran kompletu Joel Assa, daudaun ne’e ho idade 31, husi munisípiu Viqueque.
Jornalista : Alexandra da Costa
Editór : Cancio Ximenes
