Governu aprova estinsaun Millennium Challenge Account-Timor-Leste
DILI, 01 Abríl 2026 (TATOLI)—Governu Konstitusionál da-sia (IX) liuhusi reuniaun Konsellu Ministru, kuarta ne’e, aprova projetu Dekretu-Lei ne’ebé aprezenta husi Vise-Ministra Finansa, Regina de Jesus, kona-ba estinsaun Millennium Challenge Account-Timor-Leste, Institutu Públiku.
Tuir desizaun hodi hakotu Akordu Kompaktu husi Governu Estadu Unidu Amérika ne’ebé prevee ona programa kooperasaun ida iha área bee-moos, saneamentu no drainajen nomós edukasaun, no diploma ida-ne’e determina estinsaun ba entidade ida-ne’e, ne’ebé kria hodi garante ezekusaun husi programa neʼebé temi ona.
Normalmente materiál sira-ne’e konsidera hanesan Patrimóniu Estadu no entrega fali ba instituisaun relevante sira hanesan Bee Timor-Leste, Ministériu Edukasaun, Ministériu Ensinu Superiór Siénsia no Kultura.
Hanesan foin dadauk iha 19 Marsu ne’e, Millenium Challenge Account Timor-Leste (MKA-TL) halo transferénsia materiál patrimóniu Estadu ne’ebé durante ne’e sira utiliza no entrega fali ba Bee Timor-Leste, Emperza Públiku (BTL, E.P) hodi kontinua implementa programa bee no saneamentu iha Timor-Leste.
Atividade ida-ne’e organiza ho objetivu atu formalisa transferénsia patrimóniu no rezultadu dokumentu projetu sira-neʼebé implementa ona husi MKA-TL ba BTL, E.P hodi asegura sustentabilidade no kontinuidade ba servisu sira iha setór bee no saneamentu.
Tanba ne’e, diploma ne’e define prosesu estinsaun ida-ne’ebé ordenadu, neʼebé inklui likidasaun ba obrigasaun finanseira, jestaun no alokasaun patrimóniu, nomós devolve (fó fali) rekursu ne’ebé la uza ba Tezouru.
Ida-ne’e, prevee mós elaborasaun relatóriu kona-ba atividades no rekursu ne’ebé sei iha, no mós konservasaun dadus programa nian husi Ministériu Finansa.
Jornalista : Alexandra da Costa
Editór : Cancio Ximenes
