MESSK konsidera kampus DITKREO nu’udar referénsia ba eskola polu iha territóriu

OEKUSI, 05 Marsu 2026 (TATOLI) – Ministru Ensinu Superiór Siénsia no Kultura (MESSK), José Honório da Costa Pereira Jerónimo, akompaña ho membru Autoridade Rejiaun Administrativa Espesiál Oekusi Ambeno (RAEOA), kinta lorokraik ne’e, hala’o vizita ba Dili Institutu Kampus Rejionál Oekusi (DITKREO) hodi observa direita fasilidade, atividade akadémika no prosesu ensinu apredizajen.

“Horsehik iha Konsellu-Ministru, ha’u hetan orientasaun husi Primeiru-Ministru atu mai vizita Oekusi, atu observa instituisaun akadémiku DITKREO, hodi haree sira-nia atividade akadémika. Institusionálmente DIT la’o di’ak, iha estudante la barak maibé iha kursu haat la’o di’ak tanba profesór iha, se ensinu superiór hothotu iha Timor-Leste, sira iha eskola polu halo hanesan DIT iha Oekusi, ha’u hanoin di’ak tebtebes,” nia hateten ba jornalista sira hafoin observa iha Oekusi.

Notísia relevante:MESSK halo inspesaun ba prosesu aprendizajén iha DITKREO

Governante ne’e, kompara kualidade ensinu kuaze hanesan ho ensinu superiór sira iha nasionál no munisipíu sira seluk, tanba estudante sira aprende bazeia kurríkulu ne’ebé Ministériu Ensinu Superíor iha.

“Ha’u hanoin DIT rejionál Oekusi la’o di’ak, tanba iha manorin, saladeaula, iha estudante, iha mós biblioteka, laboratóriu komputadór ho fasilidade sira seluk kompletu iha mós rezidénsia ba profesór ne’ebé mai hanorin. Ohin ha’u haree eskola polu ida-ne’e diak tebes, ensinu hothotu hakarak loke eskola polu bele foti referénsia husi DITKREO, tan ne’e ha’u mai vizita ko’alia ho estudante no profesór sira, iha profesór sufisiente tanba iha permanente na’in-sia, depois reforsa tan husi Dili hanorin materia balun, no sei rekruta tan profesór lian-tetun no portugés, ne’ebé ha’u-nia instrusaun kontinua uza lian tetun no portugés tanba ne’e ita-nia lian ofisiál,” nia orgullu.

Tanba nia promete, sei atualiza rezultadu monitorizasaun DITKREO nian ba Primeiru-Ministru (PM) Kay Rala Xanana Gusmão kona-ba prosesu tomak ho susesu ne’ebé iha, maske do’ok husi nasionál.

Notísia relevante:INAP-DIT selebra akordu fasilita formasaun IT ba funsionáriu RAEOA

Iha biban ne’e, Diretór DITKREO, João Muni, orgullu tanba vizita ofisiál ne’e, importante, atu observa direita, tanba bazeia avalisaun husi Ajénsia Nasionál Avaliasaun Akreditasaun Akadémika Institutu Públiku (ANAAA,I.P) DITKREO hetan valór B.

“Ami orgullu tebes, tanba primeira-véz Ministru Ensinu Superiór mai vizita kampus DITKREO, iha regulár baibain husi diresaun sira mak mai halo monitorizasaun, ida-ne’e oportunidade di’ak atu bele direita haree no bele iha rekomendasaun ruma, ba lala’ok kampus polo iha munisípiu, atu informa katak ami hetan ona avaliasaun dala barak ona husi ANAAA, ne’ebé ami hetan valór B, espera ba futuru bele sa’e tan ba B+, liu ida-ne’e mós di’akliu tan,” nia hateten.

Autoridade akadémika DITKRE ne’e informa, estudante ativu ne’ebé daudaun hala’o hela estudu iha kampu DITKREO hamutuk 200-resin no profesór na’in-sia maioria mastradu no doutoramentu ida, ho  fakuldade rua mak enjeñária iha departementu rua hanesan Siénsia Komputadór no Enjeñária Sívil, Fakuldade Jestaun Negósiu (Bussiness Management) iha departementu rua: Jestaun Jerál no Jestaun Finansa.

Nune’emós, dezde DITKREO harii iha 2009 to’o ohin loron konsege gradua ona estudante 600-resin

Notísia relevante:DIT RAEOA-KOICA inaugura laboratóriu komputadór fasilita kursu gratuita

Observasaun Jornalista Ajénsia Tatoli,I.P, iha vizita ofisiál ne’e, Ministru Ensinu Superiór Siénsia no Kultura  akompaña husi Autoridade RAEOA haree direita ba sala senadu, sala kultura, saladeaula, laboratóriu komputadór sira no biblioteka.

Jornalista: Abílio Elo Nini

Editór: Rafael Ximenes de A. Belo